Reykjavíkurborg hyggst reisa nýtt minnismerki í Hljómskálagarðinum sem tileinkað verður kvennabaráttu á Íslandi. Markmiðið er að heiðra framlag Rauðsokkahreyfingarinnar og minna á baráttu kvenna fyrir jafnrétti, félagslegu réttlæti og jöfnuði. Þetta kemur fram í fréttatilkynningu á vef Reykjavíkurborgar.
Verkefnið er unnið í samstarfi við fulltrúaráð verkalýðshreyfingarinnar í Reykjavík og byggir á viljayfirlýsingu sem undirrituð var í október á síðasta ári.
Minnismerkið verður hannað af myndlistarkonunni Evu Ísleifs og er byggt á endurgerð verksins Venusar eða Sáttarinnar. Upprunalega styttan var gerð af Jóni Benediktssyni fyrir leikmynd í sýningunni Lýsiströtu árið 1970, sem Brynja Benediktsdóttir leikstýrði.
Styttan tengist upphafi Rauðsokkahreyfingarinnar, en hún var notuð í kröfugöngu verkalýðsins í Reykjavík 1. maí 1970 þegar konur í rauðum sokkum stigu fram og hófu skipulagða baráttu sína.
Gert er ráð fyrir að minnismerkið verði reist austast í Hljómskálagarðinum og verði rúmir tveir metrar á hæð. Sérstakt teymi á vegum borgarinnar, með þátttöku Listasafns Reykjavíkur, umhverfis- og skipulagssviðs og verkalýðshreyfingarinnar, vinnur nú að nánari útfærslu og framkvæmd verkefnisins í samráði við aðra hagaðila.
Með minnismerkinu vill Reykjavíkurborg styrkja stöðu sína sem jafnréttisborg og halda á lofti sögu og arfleifð kvennabaráttu á Íslandi.
Hér má sjá tillögu borgarstjóra.
Athugasemdir