„Plasttappakallinn á þinginu
Jón Pétur Ziemsen, hinn gagnmerki þingmaður Sjálfstæðisflokksins sem frægur varð af endemum í málþófinu á Alþingi með makalausri ræðu um plasttappa, er enn að gera garðinn frægan.“
Þannig hefst Facebook-færsla Össurar Skarphéðinssonar, fyrrverandi ráðherra, þar sem hann gagnrýnir harðlega ummæli þingmanns Jón Pétur Zimsen og segir þau gefa tilefni til alvarlegrar umræðu um viðhorf til kvenna í samfélaginu.
Í færslunni, sem er löðrandi í kaldhæðni, vísar Össur til nýlegrar umræðu um ummæli Zimsen á samfélagsmiðlinum X þar sem hann fjallaði um geðheilsu ungra kvenna og tengdi hana meðal annars við aukna þátttöku þeirra í háskólanámi og stjórnunarstöðum.
Össur gagnrýnir sérstaklega orðalag Zimsen þar sem hann segir: „Við bælum ekki niður árþúsunda náttúruval vegna skoðana framsækinna háskólamanna af hugvísindadeildum.“ Að mati Össurar má túlka þessi orð sem vísbendingu um að þingmaðurinn telji konur síður hæfar til stjórnunarstarfa og að menntun þeirra kunni að hafa neikvæð áhrif á geðheilsu þeirra.
„Varla er þó hægt að túlka þetta öðru vísi en svo að þingmaðurinn sé þeirrar skoðunar að konur séu erfðafræðilega miður hæfar til að gegna stjórnunarstörfum og að menntun þeirra kunni að eiga sök á versnandi geðheilsu. Þetta eru semsagt skilaboð Sjálfstæðisflokksins til ungra kvenna á fyrsta fjórðungi 21. aldarinnar.“
Hann segir að slíkur málflutningur endurspegli ákveðin skilaboð til ungra kvenna í samtímanum og setur þau í samhengi við eldri viðhorf til hlutverks kvenna í samfélaginu. „Rifjast þá upp ummæli þekkts leiðtoga úr skyldum flokki sem af öðru tilefni lét svo um mælt að staða konunnar væri á bakvið eldavélina!“ skrifar hann.
Í lok færslunnar gagnrýnir Össur einnig stöðu Sjálfstæðisflokksins og telur að slíkur málflutningur geti haft áhrif á fylgi flokksins. Þá nefnir hann einnig Þórdís Kolbrún Reykfjörð Gylfadóttir og Þorgerður Katrín Gunnarsdóttir í samhengi við pólitíska stöðu og mögulegar breytingar á vettvangi stjórnmálanna.
„Er nema von að Sjálfstæðisflokkurinn visni einsog vorblóm í hreti og að væn kona einsog Þórdís Kolbrún taki sprettinn úr Sjálfstæðisflokknum yfir í viðeisnarfaðm Þorgerðar Katrínar eftir lengstu umsókn um sendiherrastöðu sem sögur fara af?“
Afsökunarbeiðni Jóns Péturs
Jón Pétur baðst afsökunar í morgun á færslunni, í ræðustól Alþingis, að því er fram kemur í frétt Vísis, þar sem hann sagði meðal annars:
„Ég vil nota þetta tækifæri til að bregðast við þeirri umræðu sem skapaðist í kjölfar færslu sem ég birti á samfélagsmiðlum síðastliðið sunnudagskvöld. Færslan fór öfugt ofan í marga og það með réttu. Mér þykir það mjög miður. Færslan og sá skilningur sem lagður hefur verið í hana er ekki í samræmi við það sem ég vil standa fyrir né það sem Sjálfstæðisflokkurinn stendur fyrir.“
Athugasemdir