Alþingi samþykkti í dag frumvarp frá Þorbjörg S. Gunnlaugsdóttir dómsmálaráðherra um breytingar á fyrirkomulagi jafnlaunamála. Með lögunum verður skyldubundin jafnlaunavottun lögð niður og í stað hennar tekið upp nýtt og einfaldara kerfi um skýrslugjöf fyrirtækja og stofnana.
Samkvæmt tilkynningu frá stjórnvöldum er markmiðið að einfalda framkvæmdina fyrir atvinnulífið án þess að hvikað sé frá markmiðum um launajafnrétti. Áfram verði lögð rík áhersla á að tryggja jöfn laun fyrir sömu eða jafn verðmæt störf og sporna gegn kynbundnum launamun.
Í stað árlegrar jafnlaunavottunar og viðhaldsvottunar munu fyrirtæki og stofnanir nú skila gögnum til Jafnréttisstofu á þriggja ára fresti. Nýja fyrirkomulagið nær til fyrirtækja og stofnana með 50 starfsmenn eða fleiri, en ráðuneyti þurfa að skila inn gögnum óháð stærð.
Atvinnurekendur þurfa áfram að sýna fram á að launasetning byggi á málefnalegum sjónarmiðum og að ekki sé um kynbundna mismunun að ræða. Komi í ljós kynbundinn launamunur verður gerð krafa um tímasetta úrbótaáætlun þar sem fram kemur hvernig bregðast eigi við og hvernig leiðrétting fari fram.
Ráðherra mun meta árangur nýju löggjafarinnar á þriggja ára fresti meðal annars með launarannsóknum og reglubundnum viðhorfskönnunum um framkvæmd skýrslugjafar.
Í tilkynningu stjórnvalda er haft eftir Þorbjörgu að með breytingunum sé verið að einfalda kerfið en halda markmiðinu um jöfn laun kynjanna hátt á lofti. Hún segir mikilvægt að atvinnulíf og stjórnvöld vinni saman að því að tryggja jafnrétti á vinnumarkaði.
Athugasemdir