Fréttamaðurinn Árni Snævarr segir að hann hafi orðið fyrir árás á kaffihúsi við Skólavörðustíg í Reykjavík eftir atvik sem tengdist mávum. Frá þessu greinir hann í færslu á Facebook.
Samkvæmt frásögn Árna sat hann fyrir utan Mokka síðdegis þegar hann varð vitni að því að mávar hrifsuðu mat af borðum erlendra ferðamanna. Hann segir ferðamennina hafa yfirgefið svæðið í kjölfarið en fuglarnir setið eftir við matinn.
Árni kveðst í framhaldinu hafa kastað tíkalli í átt að mávunum. Þá hafi tveir menn við næsta borð brugðist ókvæða við og sakað hann um að hafa reynt að skaða fuglana. Hann segir annan mannanna í kjölfarið hafa velt borði hans um koll og reynt að ráðast á sig. Í færslunni lýsir Árni mönnunum sem „útúrspítuðum Íslendingum.“
Að sögn Árna dreifðust glerbrot og matur um svæðið við átökin. Hann segir erlenda ferðamenn hafa komið í veg fyrir að árásarmaðurinn næði til sín og að hann hafi síðan yfirgefið vettvanginn.
Í færslunni segir Árni jafnframt að lögregla hafi verið kölluð á staðinn en að mennirnir hafi þá þegar verið farnir.
Að lokum gagnrýnir Árni viðbrögð borgaryfirvalda við mávavandanum í miðborg Reykjavíkur og spyr hvort gripið verði til frekari aðgerða gegn fuglunum eða hvort ótti við andstöðu þeirra sem vilja vernda mávana standi í vegi fyrir slíku.
Athugasemdir