Lögmaðurinn Sveinn Andri Sveinsson gagnrýnir harðlega nýja hreyfingu sem hefur verið stofnuð gegn áframhaldandi samningaviðræðum Íslands við Evrópusambandið. Í færslu á Facebook sakar hann bæði hægri- og vinstrimenn um að reyna að hafa áhrif á þjóðina og koma í veg fyrir að hún fái sjálf að taka afstöðu til hugsanlegs aðildarsamnings.
Í færslunni segir Sveinn Andri:
„Hægri afturhaldsöflin á Íslandi og íslenzka vinstrið hafa aftur náð saman. Fyrst stóðu þau að verstu ríkisstjórn Íslandssögunnar. Því næst reyndu þau að skikka kjósendur til þess að kjósa Katrínu Jakobsdóttur sem forseta. Íslendingar hunzuðu þau fyrirmæli.“
Hann heldur því fram að sömu aðilar standi nú að nýrri andstöðu við Evrópusambandsviðræður.
„Nú reyna þessir sömu aðilar, afturhaldið, elítan, fjármagns- og kvótaeigendur, ásamt nytsömum vinstrimönnum og verkalýðsrekendum að segja þjóðinni fyrir verkum. „Okkur einum er treystandi”, segja þau.“
Sveinn Andri gagnrýnir einnig að Ólafur Ragnar Grímsson hafi verið fenginn til liðs við málstaðinn.
„Dregin er fram á sjónarsviðið klappstýra útrásarvíkinganna sem settu Ísland á hausinn, Ólafur Ragnar Grímsson, sem barðist hart gegn EES á sínum tíma og taldi aðild að ESB betri kost.“
Að lokum segir hann að Íslendingar þurfi ekki á leiðsögn valdastéttar að halda þegar komi að ákvörðun um hugsanlegan aðildarsamning við Evrópusambandið.
„Hvorki í forsetakosningunum 2024 né þann 29. ágúst nk. þarf íslenzkur almenningur á vellaunaðri yfirstéttarelítu að halda til að hafa vit fyrir sér. Íslendingum er treystandi til að kjósa um samning sem kann að nást við ESB.“
Færslunni lýkur hann með skýrri afstöðu sinni:
„Áfram Ísland! Tökum upplýsta ákvörðun og segjum JÁ víð að sjá samning við ESB.“
Athugasemdir