Aðgerðir vegna minkanna sem sluppu úr minkabúi í Mosfellsdal hafa gengið vel síðasta sólarhringinn, að sögn yfirvalda Mosfellsbæjar. Veiðimenn á vegum sveitarfélagsins hafa fangað fleiri minka og bendir margt til þess að dýrin hafi ekki farið langt frá búinu.
Í tilkynningu Mosfellsbæjar kemur fram að minkar hafi eingöngu veiðst í gildrum sem staðsettar eru innan girðingar búsins en enginn hafi enn farið í gildrur utan hennar. Það sé vísbending um að flestir minkanna haldi sig enn í nágrenni búsins.
Þá segir að ábendingar frá íbúum Mosfellsbæjar um minka hafi verið mjög fáar, sem þyki góðs viti. Nokkrar tilkynningar hafi borist frá Norðlingaholti, Grafarholti og Grafarvogi en talið sé ólíklegt að þeir minkar tengist atvikinu í Mosfellsdal.
Björgunarsveitin sinnti veglokunum fram yfir miðnætti í gær og hóf aftur gæslu klukkan átta í morgun. Minkaveiðimenn á vegum Mosfellsbæjar verða áfram við störf næstu daga og vikur. Sveitarfélagið bendir á að þeir séu auðþekkjanlegir í gulum eða appelsínugulum vestum merktum Mosfellsbæ. Íbúar sem verða varir við ómerkta veiðimenn eru beðnir um að tilkynna það til bæjarins.
Mosfellsbær hyggst halda gildrum utan girðingar búsins næstu daga og vikur og verða þær yfirfarnar reglulega til að tryggja velferð dýranna.
Íbúar í næsta nágrenni við minkabúið eru jafnframt beðnir um að láta börn ekki sofa utandyra í barnavögnum næstu daga. Þeir sem búa fjær eru hvattir til að setja net yfir vagnana.
Einnig er mælt með því að íbúar í Mosfellsdal haldi köttum sínum inni fram yfir helgi, fari með hunda í taumagöngu og hafi alífugla innan girðingar.
Mosfellsbær segir að enginn minkur hafi enn verið fangaður í þéttbýli bæjarins og því sé ekki talin ástæða til að gera sérstakar ráðstafanir vegna gæludýra í öðrum hverfum sveitarfélagsins. Gæludýraeigendur eru þó hvattir til að gæta fyllsta öryggis.
Athugasemdir