Úrskurðarnefnd kosningamála hefur hafnað kröfu um að þjóðaratkvæðagreiðslan um aðildarviðræður Íslands við Evrópusambandið, sem fram fór 29. ágúst síðastliðinn, yrði ógilt. Úrskurðurinn var kveðinn upp 22. september.
Kæra vegna atkvæðagreiðslunnar barst nefndinni 25. ágúst, fjórum dögum áður en kosið var. Kærandi gerði meðal annars athugasemdir við orðalag spurningarinnar, framsetningu svarkosta og lögbundna kynningu landskjörstjórnar.
Í þjóðaratkvæðagreiðslunni var spurt: „Á Ísland að hefja á ný aðildarviðræður við Evrópusambandið?“ og gátu kjósendur svarað já eða nei.
Kærandi taldi að framsetningin gæti haft áhrif á afstöðu kjósenda og að annar valkosturinn hefði verið sýnilegri og auðveldari að ramma inn en hinn. Þá óskaði hann eftir því að nefndin kannaði hvort annmarkar á opinberri kynningu gætu talist galli á kosningu og leitt til ógildingar.
Úrskurðarnefndin féllst ekki á þau sjónarmið. Hún benti á að Alþingi hefði samþykkt orðalag spurningarinnar 28. maí eftir að utanríkismálanefnd hafði fjallað ítarlega um málið og aflað álits Feneyjanefndar Evrópuráðsins.
Þá taldi nefndin ekkert benda til annars en að kynning landskjörstjórnar hefði verið í samræmi við kosningalög og kröfur um hlutlæga framsetningu. Kynningarefnið var unnið af Lagastofnun Háskóla Íslands.
Nefndin sagði jafnframt ekkert hafa komið fram um hnökra á framkvæmd atkvæðagreiðslunnar sjálfrar.
Var niðurstaðan því sú að ekki hefðu verið sýndir fram á gallar á undirbúningi eða framkvæmd kosninganna sem líklegt væri að hefðu haft áhrif á úrslitin. Kröfu kæranda um ógildingu þjóðaratkvæðagreiðslunnar var því hafnað.
Athugasemdir