Davíð Már Stefánsson var aðeins sautján ára þegar hann byrjaði að spila í spilavítum á netinu. Tveimur árum síðar var fíknin farin að stjórna lífi hans, hann hafði eytt sparnaði sínum og steypt sér í skuldir.
Davíð opnaði sig um fíknina í viðtali við Vísi.
Í fyrstu lagði hann undir lágar fjárhæðir en fljótlega vann hann tæpa milljón króna. Eftir það jókst spilamennskan hratt.
Hann gat vakað tvær eða þrjár nætur í röð við að spila, mætt síðan í skólann og haldið áfram þar. Launin fóru í fjárhættuspil og síðar tók hann yfirdrátt. Þegar peningarnir kláruðust fékk hann lánað hjá foreldrum og öðrum.
Um nítján ára aldur sagði Davíð foreldrum sínum loks frá vandanum og hálfrar milljónar króna yfirdrætti. Móðir hans brast í grát og foreldrarnir voru í áfalli.
„Þegar ég var búinn að segja þeim frá þessu þennan dag fór ég inn í herbergið mitt, læsti mig inni og byrjaði aftur að spila. Ég fór bara í einhvers konar „blackout“. Ég held að spilafíklar skilji hvað ég á við þegar ég segi það. Ég man bara ekkert. Ég eyddi og eyddi og spilaði og spilaði. Það tók mig ekki nema klukkutíma að klára alla peningana mína. Það var enginn peningur eftir á framtíðarreikningnum, allur peningurinn var búinn. Síðan man ég bara að ég sat á rúmgaflinum hágrátandi.“
Davíð leitaði síðar til móður sinnar og bað um hjálp. Hún hafði samband við Ölmu Hafsteins hjá Spilavanda og hann hóf meðferð. Hann sótti einnig fund hjá Gamblers Anonymous.
Í dag segist Davíð taka einn dag í einu. Reynslan hefur jafnframt orðið honum hvatning til að hjálpa öðrum og vinnur hann nú að snjallforriti sem ætlað er að auðvelda fólki, sérstaklega ungu fólki, að stíga fyrsta skrefið í átt að hjálp.
Athugasemdir