Eigandi Taylor's Tivoli, sem rekur parísarhjólið í Reykjavík, segir að engir gestir hafi verið skildir eftir í sjálfheldu í hjólinu.
Frétt um atvikið, sem birtist í gær, var unnin upp úr dagbók lögreglu. Þar kom fram að tveir gestir hefðu óskað eftir aðstoð eftir að hjólið stöðvaðist og starfsmenn virtust hafa yfirgefið svæðið. Þegar lögregla kom á vettvang höfðu starfsmenn hins vegar þegar losað fólkið.
Kane Taylor, eigandi Taylor's Tivoli, segir við mbl.is að stutt rafmagnstruflun hafi orðið og nauðsynlegt hafi verið að endurræsa kerfi hjólsins. Hjólið hafi því staðið kyrrt í nokkrar mínútur á meðan öryggisferlum var fylgt.
Taylor segir starfsmenn hafa verið við hjólið allan tímann og það aldrei verið yfirgefið eða eftirlitslaust.
Hann leggur áherslu á að öryggi gesta sé í algjörum forgangi og að öllum viðeigandi öryggisferlum hafi verið fylgt áður en hjólið var ræst að nýju.
Íbúar í Hveragerði ósáttir
Mannlíf hefur áður fjallað um Taylor's Tivoli Iceland, en sumarið 2024 komu upp alvarlegar ásakanir á hendur starfsmönnum tívolísins í tengslum við bæjarhátíðina Blómstrandi daga í Hveragerði. Þar voru starfsmenn sakaðir um að hafa ráðist á barn og var málið tilkynnt bæði til lögreglu og barnaverndaryfirvalda.
Mannlíf ræddi þá við nokkra gesti hátíðarinnar sem lýstu samskiptum sínum við starfsfólk tívolísins. Voru viðmælendurnir sammála um að framkoma starfsmanna hefði verið óviðeigandi og einkenndst af dónaskap og skætingi.
Kane Taylor var mjög ósáttur við umfjöllun Mannlífs á sínum tíma og gagnrýndi fréttaflutninginn harðlega. Sagði hann umfjöllunina að hans mati fremur vera skoðun en fréttaflutning.
Taylor greindi blaðamanni jafnframt frá því að lögmaður hans myndi hafa samband vegna málsins. Ekkert varð þó af þeim boðuðu samskiptum við lögmanninn.
