Virti bandaríski fjölmiðillinn Forbes fjallar um fyrirhugað náttúru- og innviðagjald íslenskra stjórnvalda sem myndi leggjast á erlenda ferðamenn sem heimsækja Þingvelli, Geysi og Gullfoss.
Forbes bendir á að Gullni hringurinn sé meðal vinsælustu ferðamannaleiða Íslands og nánast ómissandi viðkomustaður margra sem heimsækja landið í fyrsta sinn.
Samkvæmt frumvarpsdrögum stjórnvalda myndu einstaklingar 18 ára og eldri, sem ekki eru frá Íslandi, greiða 4.500 krónur fyrir aðgang að stöðunum frá júní til október. Frá nóvember til maí yrði gjaldið 3.000 krónur.
Forbes tekur fram að rafrænn aðgangspassi myndi gilda á alla þrjá staðina í eitt ár. Stefnt er að því að kerfið taki gildi í maí 2027 en tillögurnar eru enn í samráðsferli.
Í umfjöllun Forbes kemur fram að kostnaður ferðamanna gæti þó orðið meiri. Hætt yrði að innheimta bílastæðagjald á Þingvöllum en áfram yrði rukkað fyrir bílastæði við Geysi og Gullfoss, þar sem þau eru í einkaeigu. Bílastæðagjaldið er nú um 1.200 krónur á hvorum stað. Ferðamaður á eigin bíl gæti því greitt samtals um 6.900 krónur fyrir Gullna hringinn að sumri.
Forbes greinir einnig frá gagnrýni íslenskrar ferðaþjónustu á hugmyndina. Björn Ragnarsson, forstjóri Icelandia, hefur bent á að 4.500 króna gjaldið samsvari um 40 prósentum af verði Gullna hrings ferðar.
Hanna Katrín Friðriksson atvinnuvegaráðherra hefur varið tillögurnar og bent á að íslenskir skattgreiðendur standi nú þegar undir kostnaði við innviði og náttúruvernd.
Forbes setur málið jafnframt í norrænt samhengi og bendir á að sambærileg þróun eigi sér stað í Noregi, þar sem unnið er að nýjum gjöldum á ferðamenn. Þar á meðal eru fyrirhuguð gistináttagjöld og sérstök gjöld á farþega skemmtiferðaskipa.
