Shawn Kemp, ein helsta NBA stjarna 10. áratugarins, hefur játað sök í skotárás.
Körfuboltamaðurinn lenti í deilum á bílastæði í Tacoma í Washington fylki í Bandaríkjunum í mars 2023 sem endaði með því að hann dró upp byssu og hóf skothríð. Upphaflega bar Kemp fyrir sig sjálfsvörn og sagðist hafa verið í hættu.
Hann hefur nú skipt um skoðun og játað brot sitt. Hann mun mæta í réttarsal í ágúst þar sem dómur yfir honum verður ákveðinn.
Leikmaðurinn komst í úrslit NBA með Seattle Supersonics árið 1996 og var almennt talinn besti maður liðsins en þar tapaði það fyrir Chicago Bulls með Jordan í broddi fylkingar. Hann spilaði 14 tímabil í deildinni og skoraði að meðaltali 14,6 stig í leik og hirti 8,4 fráköst. Þá var hann sex sinnum valinn í Stjörnulið deildarinnar.
