Miðflokkurinn á Ísafirði útilokar ekki samstarf við Sjálfstæðisflokkinn þrátt fyrir afar persónulegar deilur milli frambjóðanda flokkanna.

Samkvæmt heimildum Mannlífs á frambjóðandi Miðflokksins í Ísafjarðabæ í persónulegum deilum við frambjóðanda Sjálfstæðisflokksins þar á bæ. Þrátt fyrir það segir oddviti Miðflokksins, Sævar Óli Hjörvarsson, að deilurnar hafi ekki áhrif á möguleika flokkana til að starfa saman, fari kosningarnar á morgun á þá leið að Miðflokkurinn og Sjálfstæðisflokkurinn geti myndað meirihluta.

„Þetta eru bara persónulegar deilur þeirra á milli og kemur pólitíkinni ekkert við,” sagði Sævar Óli í samtali við Mannlíf. Aðspurður hvort Miðflokkurinn myndi styðja oddvita Sjálfstæðisflokksins, Jónas Þór Birgisson, lyfsala í stöðu bæjarstjóra sagði Sævar Óli hlæjandi að Jónas hefði engan áhuga á að verða bæjarstjóri. „Hann langar ekkert að verða bæjarstjóri, hann er í fullri vinnu og vill bara komast í bæjarstjórn.”

Ekki náðist í Jónas Þór við gerð fréttarinnar, þrátt fyrir ítrekaðar tilraunir.