Haraldur Sigurðsson, jarð- og jarðefnafræðingur, segir brýnt að Ísland haldi áfram aðildarviðræðum við Evrópusambandið í ljósi breyttra alþjóðaaðstæðna.

Í Facebook-færslu fjallar hann um fyrirhugaða þjóðaratkvæðagreiðslu og mikilvægi hennar:

„Það verður þjóðaratkvæðagreiðsla á Íslandi hinn 29. ágúst um hvort halda skuli áfram aðildarviðræðum varðandi inngöngu í Evrópusambandið. Þetta er stórt mál fyrir Ísland, einkum nú, þegar tengsl við Bandaríkin eru óviss og vægast sagt óáreiðanleg.“

Hann bendir á breytta stöðu alþjóðamála og segir að klofningur hafi myndast milli Evrópu og Bandaríkjanna:

„Nýlega hefur orðið klofningur milli Bandaríkjanna og Evrópuþjóða, og því kalla margir eftir sterkari samböndum meðal þjóða sem hafa tekið þátt í NATO hernaðarbandalaginu.“

Haraldur, sem búið hefur í Bandaríkjunum í 53 ár, segir stöðu NATO hafa veikst og gagnrýnir þróunina í Bandaríkjunum:

„Það bandalag stendur nú á mjög veikum fótum þar sem Trump og þar með Bandaríkin hafa mikið dregið úr þátttöku og jafnvel lýst yfir þeirri skoðun að leggja niður NATO.“

Hann telur að Ísland geti ekki treyst á Bandaríkin til framtíðar og að þau séu nú orðin að auðræði:

„Ameríka er því náungi sem þú þekkir, en af nýlegri reynslu og almennri framkomu er þetta ekki náungi sem þú treystir. Ameríka er nú oligarchy.“

Þá segir hann Ísland standa varnarlaust án sterkra bandalaga:

„Ísland er í raun óvarið land í dag.“

Að mati Haraldar er því mikilvægt að horfa til Evrópu:

„Þá ber fyrst að kanna hvar eru vinir og frændur Íslendinga. Uppruni Íslendinga, forn og ný menningartengsl eru tvímælalaust í Norður Evrópu.“

Hann dregur af þessu þá niðurstöðu að halda þurfi áfram viðræðum:

„Það er því mín skoðun að nú sé brýnt að halda áfram aðildarviðræðum varðandi inngöngu í Evrópusambandið.“