Pentagon hefur hafið birtingu skjala um óþekkt loftfyrirbæri, svokölluð UAP eða UFO, og innihalda skjölin meðal annars ljósmyndir, myndbönd og gögn sem safnað hefur verið saman af fjölmörgum bandarískum stofnunum.
Verkefnið er samstarf milli varnarmálaráðuneytisins, NASA, alríkislögreglunnar FBI, Hvíta hússins og fleiri leyni- og rannsóknastofnana Bandaríkjanna.
Í skjölunum eru meðal annars myndir sem teknar voru úr bandarískum herflugvélum og sýna óskýra punkta á himni. Þá eru einnig myndir frá Apollo-geimförunum þar sem ógreinanleg fyrirbæri sjást yfir yfirborði tunglsins.
Birtingin kemur í kjölfar þess að Donald Trump forseti beindi því til Pentagon og annarra alríkisstofnana að bera kennsl á og birta stjórnvaldsskjöl sem tengjast „geimverum og lífi utan jarðar, óþekktum fyrirbærum í lofti og fljúgandi furðuhlutum“
Áður hafði Pentagon birt skýrslu árið 2021 þar sem komist var að þeirri niðurstöðu að engar sannanir fyndust fyrir tengslum slíkra fyrirbæra við geimverur.
Pete Hegseth varnarmálaráðherra Bandaríkjanna sagði í yfirlýsingu að skjölin hefðu lengi verið falin undir trúnaðarstimplum og að almenningur ætti rétt á að sjá þau. Hann sagði birtinguna sýna fram á „fordæmalausa skuldbindingu stjórnvalda gagnvart gagnsæi“.
Sérfræðingar efins
Sérfræðingar eru þó efins um að gögnin muni skýra mikið. Sean Kirkpatrick, fyrrverandi yfirmaður rannsóknarskrifstofu Pentagon á óútskýrðum fyrirbærum, segir ekkert óvænt koma fram í skjölunum og telur að skortur á samhengi muni frekar ýta undir samsæriskenningar og vangaveltur.
Rannsakandinn Mick West tók í svipaðan streng og sagði gögnin ekki innihalda neitt sérstaklega áhugavert. „Fleiri punktar, meiri sjónblekking,“ sagði hann.
Aðrir hafa þó fagnað birtingunni. Samtökin Disclosure Foundation kölluðu hana „mikilvægt skref í átt að auknu gagnsæi“.
Í sumum skjölunum eru einnig frásagnir Apollo-geimfara. Þar lýsir Buzz Aldrin meðal annars fyrirbæri sem hann taldi hugsanlega vera hluta af Saturn V-eldflauginni sem notuð var í Apollo-áætluninni.
„Ágætis byrjun“
Gunnar Dan, rithöfundur og einn helsti sérfræðingur Íslands í geimverufræðum, birti myndband á YouTube-rás sinni, Geimsýran, eftir miðnætti í nótt þar sem hann fer yfir fyrstu öldu skjala frá Pentagon. Gunnar viðurkennir að hafa farið of geyst í upphafi en að hann sé kominn niður á jörðina núna. Segist hann hafa skoðað öll skjölin og að hann hafi orðið fyrir nokkrum vonbrigðum en að von sé á fleiri gögnum.
„Niðurstaðan var sem sagt þessi. Þetta var ágætis byrjun. Varla meira en það,“ segir Gunnar í myndbandinu en bendir þó á að það sé ýmislegt fróðlegt að sjá í skjölunum en ekkert byltingakennt, ekki ennþá í það minnsta.
