Árið 1993 kom upp ansi sérstakt fjárkúgunarmál á Íslandi. Var þá tæplega fertugur maður ákærður fyrir að hafa fé af tveimur mönnum en aðferðin sem hann notaði var öðruvísi en áður þekktist.
Maðurinn hljóðritaði sem sagt símtöl mannanna í svokölluðum Stefnumótasímanum, þar sem fólk gat skilið eftir símanúmer sín og spjallað við einstaklinga sem voru að leita að stefnumóti. Þóttist maðurinn vera kvenmaður þegar mennirnir tveir hringdu en í símtölunum sögðu þeir honum frá óskum sínum á kynlífssviðinu og fleiri persónuupplýsingum. Náði hann út úr þeim sitt hvorum 50.000 krónum sem í dag væru um 189.954 krónur í dag, með því að hóta að segja eiginkonu annars þeirra frá samtalinu og senda upptöku af samtalinu til bæjarins sem hinn bjó í.
DV skrifaði frétt um málið á sínum tíma sem lesa má hér:
Ákærðu fyrir að hafa fé af tveimur mönnum:
Hótaði að segja frá kynlífsóskum og framhjáhaldi
– Hljóðritaði símtöl í Stefnumótasímanum
Ríkissaksóknari hefur gefið út ákæru á hendur tæplega fertugum manni fyrir fjárkúgun. Manninum er gefið að sök að hafa snemma árs 1993 hljóðritað samtöl í Stefnumótasímanum. Í samtölunum komu fram ýmsar upplýsingar manna um sjálfa sig, óskir þeirra á kynlífssviði og jafnvel fullyrðingar um framhjáhald. Upplýsingarnar fékk hann meðal annars með því að leika kvenmann í símann. Þannig fékk hann þá til að greiða fé inn á bankareikning sinn. Tók hann peningana út og nýtti sér. Þannig fékk hann mann til að greiða þann 21. apríl síðastliðinn 50 þúsund krónur inn á sparisjóðsreikning í Íslandsbanka gegn hótun um að segja annars eiginkonu mannsins og samkeppnisaðila frá samtalinu. Á sama hátt fékk hann annan mann til að greiða 50 þúsund krónur inn á sama reikning þann 30. apríl gegn hótun um að senda segulbandsspólur til bæjarins sem hann var búsettur í. Í ákærunni er þess krafist að maðurinn verði látinn sæta refsingu samkvæmt 251. grein hegningarlaga en brot á þeirri grein varðar 6 ára fangelsi. Einnig krefjast þeir aðilar sem brotið var gegn samtals 100 þúsunda króna skaðabóta úr hendi mannsins.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
































Athugasemdir