Dóra Jóhannsdóttir, leikkona, handritshöfundur og leikstjóri, hefur náð samkomulagi við framleiðslufyrirtækið Glassriver vegna sjónvarpsþáttaraðarinnar Húsó, sem byggð er á hennar eigin reynslu.

Í færslu á Facebook í dag segir Dóra:

„Þann 17. apríl síðastliðinn náði ég loks samkomulagi við Glassriver vegna sjónvarpsseríunnar Húsó, sem byggði á minni eigin reynslu. Greiðsla hefur farið fram, en eftir að lögfræðikostnaður síðustu þriggja ára vegna málsins hefur verið gerður upp stendur nánast ekkert eftir.“

Hún segir að samkomulagið hafi meðal annars tryggt að nafn hennar og hlutverk verði rétt skráð í tengslum við þættina:

„Það var svo ekki fyrr en í gær sem ég fékk loks staðfestingu á því að eftirfarandi kredit hafa verið sett í leiðréttingarferli á þeim stöðum þar sem það skiptir mig máli faglega: „Creator“ á alla þætti, „Story by“ á alla þætti, „Written by“ á 1. þátt undir dulnefninu Hekla Hólm og „Executive Producer“.“

Ekki full sátt

Dóra tekur fram að þetta jafngildi ekki fullri sátt:

„Samkomulagið jafngildir ekki sátt, en það setur mikilvægan lokapunkt eftir langan og erfiðan kafla. Það sem skiptir mig mestu máli er að ég get loks sett þetta mál að baki og þarf ekki að fara í langt og íþyngjandi dómsmál.“

Hún segir að ágreiningurinn hafi komið upp án fyrirvara:

„Ég var í sjúkraleyfi þegar tökum var flýtt án minnar vitundar. Fram að því hafði enginn ágreiningur komið upp, en samt var lokað á aðkomu mína að seríunni sem höfundar og leikstjóra án samtals.“

Að hennar sögn hefur málið haft mikil áhrif á hana:

„Þetta mál hefur valdið mér gífurlegu álagi síðustu þrjú árin og það er alls ekki sjálfsagt að ég hafi komist heil í gegnum það.“

Hún segir að baráttan fyrir því að fá réttindi sín viðurkennd hafi verið löng og erfið:

„Til að reyna að fá réttindi mín viðurkennd skrifaði ég mörg hundruð tölvupósta, sem fæstum var svarað, auk ritgerða, greina og meira að segja heila bók. Það ætti enginn að þurfa að eyða árum, heilsu, fjármunum og ómældri orku í að fá grundvallarréttindi sín virt.“

Dóra segir jafnframt að reynslan hafi haft áhrif á sýn hennar á kvikmyndaiðnaðinn:

„Ef kvikmyndabransinn á að verða heilbrigður og öruggur vinnustaður þarf mikið að breytast.“

Hún lýsir því að samkomulagið marki ákveðin tímamót og að hún sé afar þakkláta þeim sem stóðu með henni í ferlinu:

„Ég verð ævinlega þakklát þeim sem voru til staðar og sýndu stuðning. Það er ólýsanlegur léttir að þessu sé loksins lokið.

Húsó varð þannig á vissan hátt sú batasaga sem ég lagði upp með að segja.“