Hér er það helsta úr dagbók lögreglu frá klukkan 17:00 27. júní 2026 til 05:00 28. júní 2026. Fimm gistu fangageymslur lögreglunnar í nótt. Alls voru 76 mál skráð í kerfi lögreglu frá klukkan 17:00 í gær til 05:00 í morgun.
Maður réðst að hópi drengja í sundlaug á höfuðborgarsvæðinu í gær. Drengirnir lentu á manninum og ungum syni hans eftir ferð í rennibraut og reiddist maðurinn við það. Ekki kemur fram í hvaða sundlaug atvikið átti sér stað, en það var í umdæmi lögreglustöðvar eitt sem nær yfir miðborg, Vesturbæ og Seltjarnarnes.
Lögreglan fékk einnig tilkynningu um ungmenni að brjótast inn í skóla og var það athæfi stöðvað.
Nokkur umferðarslys voru tilkynnt. Slys varð við það að ökumaður truflaðist vegna farsíma og tilkynnt var um þrjú slys á smáfarartækjum þar sem allir ökumenn eru grunaðir um ölvun.
Þrír ökumenn voru kærðir fyrir akstur undir áhrifum áfengis eða vímuefna. Þá var ökumaður kærður fyrir að aka á 121 kílómetra hraða á klukkustund þar sem hámarkshraði var 90. Ungur ökumaður missti stjórn á bifreið og ók henni út af vegi.
Alvarleg líkamsárás var framin á sportbar og var árásaraðilinn handtekinn og vistaður í fangageymslu.
Þá barst lögreglunni tilkynning frá ferðamönnum sem komust ekki inn í íbúð sem þeir höfðu leigt á leiguvefsíðu. Grunur leikur á að svindlað hafi verið á ferðamönnunum, eftir því sem fram kemur í tilkynningu lögreglunnar.
