Salernisaðstaða við tjaldsvæðið í Höfðavík á Hallormsstað varð fyrir töluverðum skemmdum í vikunni eftir að óprúttinn aðili eða aðilar réðust á aðstöðuna. Ekki liggur fyrir hver eða hverjir stóðu að skemmdunum, en skógarvörður segir miður að sameiginleg aðstaða sé misnotuð með þessum hætti.

Með auknum gestafjölda á vorin var ákveðið að opna salernin fyrr en ella, þrátt fyrir að tjaldsvæðið sjálft sé ekki komið í fullan rekstur. Einnig var ærslabelgur settur upp á svæðinu til að mæta aukinni aðsókn.

„Við reynum yfirleitt að koma þessari þjónustu í gang um þetta leyti árs. Fólk kemur mikið á sumardaginn fyrsta til að ganga um skóginn og við viljum geta þjónustað það,“ segir Bergrún Arna Þorsteinsdóttir, aðstoðarskógarvörður í samtali við Austurfrétt.

Þegar starfsfólk skoðaði aðstöðuna síðar kom í ljós að verulegar skemmdir höfðu verið unnar. „Það var búið að brjóta vask, hillur, spegil og rífa ofn frá veggnum. Í raun var öðru salerninu af tveimur rústað,“ segir Bergrún.

Grunur leikur á að hópur fólks hafi verið á svæðinu um kvöldið áður, en ekkert óeðlilegt sást þá. Ekki er þó vitað hvort sá hópur tengist skemmdunum og engar frekari upplýsingar liggja fyrir um mannaferðir eftir það.

„Við vonumst til að þeir sem ollu skemmdarverkum sýni þann heiðarleika að koma og ræða við okkur. Við tökum vel á móti þeim.“

Skemmdirnar fela í sér kostnað fyrir Land og skóg, sem ber ábyrgð á svæðinu. Bergrún leggur áherslu á að um sameign sé að ræða sem allir eigi að ganga vel um.

„Fyrst og fremst þýðir þetta kostnað fyrir Land og skóg. Við treystum á að fólk gangi vel um svæðið og eyðileggi ekki eigur stofnunarinnar, sem er í eigu okkar allra.“

Hitt salernið er enn nothæft og verður opið yfir helgina. Gert er ráð fyrir að viðgerðir fari fram á næstu dögum, enda styttist í að tjaldsvæðið verði opnað formlega.

„Við byrjum að opna tjaldsvæðið um næstu mánaðamót. Við erum að bíða eftir að grasflatirnar þorni.“