Þorvaldur H. Gissurarson, forstjóri ÞG verks, var allt annað en sáttur við hækkun á stýrivöxtum hjá Seðlabankanum sem tilkynnt var fyrir stuttu og fékk RÚV viðbrögð hans beint í æð.

Forstjóranum þykir sýnt að vaxtastýringartækið virki ekki til að halda niðri þenslu og einkaneyslu í verðtryggðu peningakerfi. Stýrivaxtahækkunin kostar, að hans sögn, fyrirtæki hans um 100 milljónir aukalega á ári í vaxtagreiðslur.

Vakti það athygli margra að meðan Þorvaldur kvartaði var hann klæddur í bol frá Dolce and Gabbana sem kostar tæpar 200 þúsund krónur. Forstjórinn hefur verið þekktur fyrir að lifa hátt og sem dæmi á hann Bentley-bíl sem kostar 50 milljónir króna.

Í nýju Hátekjublaði Heimildarinnar er greint frá því að Þorvaldur hafi fengið 52.151.931 í launatekjur og 552.383.882 í fjármagnstekjur í fyrra. Samtals voru árstekjur hans því 604.535.813 krónur.