Landskjörstjórn hefur opnað sérstakan kynningarvef vegna komandi þjóðaratkvæðagreiðslu um áframhald viðræðna við ESB, þar sem almenningi eru veittar hlutlausar upplýsingar um það málefni sem verður borið undir kjósendur.

Í tilkynningu frá Landskjörstjórn segir að hlutverk hennar sé að standa fyrir víðtækri kynningu á því máli sem kosið verður um. Markmið kynningarinnar sé að tryggja að kjósendur hafi aðgang að skýrum og hlutlausum upplýsingum svo þeir geti tekið upplýsta afstöðu til þeirrar spurningar sem lögð verður fyrir í þjóðaratkvæðagreiðslunni.

Á vefnum kosning.is má finna upplýsingar um sjálft málefnið auk hagnýtra upplýsinga um framkvæmd kosninganna, þar á meðal atriði sem varða þátttöku kjósenda og fyrirkomulag atkvæðagreiðslunnar.

Jafnframt kemur fram að kynningarbæklingi um þjóðaratkvæðagreiðsluna verði dreift á öll heimili landsins í ágúst sem hluta af upplýsingagjöf Landskjörstjórnar.