Nóttin var annasöm hjá lögreglunni á höfuðborgarsvæðinu en alls voru 81 mál bókuð í upplýsingakerfi á tólf tíma tímabili, frá klukkan fimm síðdegis til fimm í morgun. Fjórir einstaklingar gistu fangageymslur eftir nóttina og tengdust málin meðal annars fíkniefnasölu, innbrotum og háskaakstri.
Í miðbæ Reykjavíkur var maður handtekinn, grunaður um sölu og dreifingu fíkniefna. Hann situr nú í fangaklefa vegna rannsóknar málsins. Þá var annar maður vistaður í klefa eftir að hafa gerst sekur um alvarleg ólæti, en hann barði í bifreiðar og ónáðaði fólk á almannafæri þar til lögregla hirti hann upp.
Spyrnuðu á 190 kílómetra hraða
Lögregla þurfti að afskipta ökumenn sem stóðu í spyrnu og mældust á allt að 190 kílómetra hraða. Auk þess voru nokkrir ökumenn stöðvaðir á höfuðborgarsvæðinu, grunaðir um akstur undir áhrifum áfengis eða fíkniefna, og fundust ólögleg efni á sumum þeirra.
Tilkynnt var um vopnaðan mann með rafbyssu (tazer) í miðbænum, en hvorki maðurinn né vopnið fundust þrátt fyrir leit. Þá var lýst eftir gerendum sem brutust inn í hljóðfæraverslun og flúðu af vettvangi.
Tölvuleikjahávaði
Minni háttar mál komu einnig upp, eins og tilkynning um hávaða þar sem ungmenni voru beðin um að lækka í tölvuleikjum sínum. Loks fór lögregla í útkall vegna gruns um innbrot í heimahús, en þar reyndist einungis vera á ferðinni íbúi sem leitaði örvæntingarfullur að týndum farsíma sínum.
